Säämi taaiđârrääđi toimâ

Säämi taaidârrääđi (Sámi Dáiddarráđđi, SDR) lii vuáđudum ive 1987, já ton ulme lii ovdediđ pyere já maaŋgâmuáđusâš säämi taaiđâeellim. Säämi taaiđârrääđi pargo lii vaiguttiđ tave-eennâmlávt nuuvt ruttâdeijeid tegu äigikyevdilis asâttâssáid já ovdediđ rááđán já ton jeessânservijd tehálâš ekonomâlâš já taaiđâpoolitlâš aašijd. Säämi taaiđârrääđi tuáimá ohtâsâš čäällimkoddeen kuuđâ säämi taaiđârsiärván, moi jesânin láá jyeigeeh, filmâpargeeh, kirječälleeh, kovetaiđâreh, lyevitaiđâreh já šuoŋârähteeh neelji enâmist. Taah seervih láá Juoigiid searvi (JS, Juoigij servi), Sámi filbmabargiid searvi (SFS, Säämi filmâpargei servi), Sámi Girječálliid Searvi (SGS, Säämi kirječällei servi), Sámi Dáiddačehpiid Searvi (SDS, Säämi taaiđâčeepij servi), Sámi Lávdi (SL, Säämi lyevi) ja Sámi Komponisttaid Searvi (SK, Säämi šuoŋârähtei servi).

Säämi taaiđârrääđi ovdeed já tuárju ruttâtorjui peht ovtâskâs taiđârij ovdánem jieijâs syergist. Tađe várás rääđi haaldâš Sämitige taaiđârstipendijd, taaiđâruttârááju Dáiddafoanda, tave-eennâmlâš jurgâlemtorjuid já Säämi taiđârij já kirječällei sajanmäksimruttârááju (SDGB, Sámi Dáiddáriid ja Girječálliid Buhtadusfoanda). Uási torjuin pyehtih uuccâđ meiddei taiđâreh, kiäh iä lah SDR jeessânseervij jesâneh. Toorjâvuáháduv peht juáhhojeh ihásávt suullân 4-5 miljovn Taažâ ruvnâd toorjân säämi taiđâráid já lájádâssáid.

Säämi taaiđârrääđi tooimâ ruttâdeh Sämitigeh Taažâst, Suomâst já Ruotâst já Tave-enâmij Ministerrääđi. SDR viggá-uv taaiđâpoolitlâš pargostis vaiguttiđ puoh Sämitiggijd, Tave-enâmij ministerrááđán já eres lájádâssáid, meiddei almugijkoskâsávt.

Säämi taaiđârrääđi ráđádâl Taažâ Sämitiggijn nuuvt kuhes ko uánihis ääigi taaiđâpoolitlâš ulmijd já pargoid. Kuhes ääigi politik lii soppum ohtsâšpargosopâmušâst neelji ihán, já uánihis ääigi politik ihásâš taaiđârsopâmušâst. Kuhheeb ääigi ohtsâšpargosopâmušâst suáppojeh oovtâivvááš taaiđârsopâmuš monâttâllâm, vijđeb taaiđâpoolitlâš ulmeh sehe täärhib uásiulmeh. Oovtâivvááš taaiđârsopâmušâst suáppojeh budjetraamih toimâtorjuid, moh juáhhojeh säämi taaiđârornijduumijd já Säämi taaiđârrááđán já väriduvvojeh áámmátlâš rađđiimân, stipendáid já čáitáldâhsajanmávssoid.

Jis halijdah tiettiđ eenâb, vääldi ohtâvuođâ mijguin luámáttuv peht teikâ:

Sámi Dáiddárráđđi
Boks 23
N-9735 Kárášjohka
Norway
post@samidaiddar.no
Puh. +47 784 67 006