Sámi Dáiddárráđi (sdr) njuolggadusat

§ 1     NAMMA – LAHTUT
Searvvi namma lea Sámi Dáiddárráđđi/Samisk Kunstnerråd, SDR.
Sámi Dáiddárráđđi / Samisk Kunstnerråd, SDR, lea 6 dáiddársearvvi oktasaš ráđđeorgána. Sámi Lávdi (SL), Juoigiid Searvi (JS), Sámi Filbmabargiid Searvi (SFS), Sámi Dáiddačehpiid Searvi (SDS), Sámi Girječálliid Searvi (SGS) ja Sámi Komponisttat (SK).

§ 2     STIVRA
SDR:a jođiha stivra mii bargá SDR:a jahkečoahkkima mearridan stivrabagadusa mielde.
Stivrras galget leat 6 lahtu oktan várrelahtuiguin geaid iešguhtege lahttosearvi vállje.
SDR stivrras berrejit leat áirasat Norggas, Ruoŧas, Suomas ja Ruoššas. Stivrra oktiibidjan ferte govvidit gealbbu man searvi čađat dárbbaša.
Sii geat devdet kriteriijaid beassat sámedikki jienastuslohkui sáhttet válljejuvvot áirrasin stivrii.
Stivrajođiheaddji válljejuvvo jahkečoahkkimis, loahppa stivra vuođđuduvvo 1. stivračoahkkimis. Jođiheaddji válljejuvvo 2 jahkái.
Lahtut válljejuvvojit 2 jahkái. Stivralahut guđet dieđihit eret stivrras eai sáhte šat dieđihit stivrii

§ 3     ULBMIL
Sámi Dáiddárráđđi lea lahttoservviid hálddahus ja galgá ovddidit lahttoservviid ekonomalaš, dáiddafágalaš ja dáiddapolitihkalaš beroštumiid šiehtadallamiin Norgga, Ruoŧa ja Suoma Sámedikkiiguin, Davviriikkaid Ministtarráđiin, Ruošša guoskevaš eiseválddiiguin, ja eará lunddolaš ovttasbargoguimmiiguin.   SDR galgá ovddidit dáiddárservviid beroštumiid daid riikkaid eiseválddiide gos sámi dáiddárat ásset.

SDR galgá gaskkustit ja ieš dahkat álgagiid árjjalaš oktavuhtii eará dáiddárservviiguin sihke našuvnnalaččat ja internašuvnnalaččat ja earenoamážit arvvosmahttit oktavuhtii álgoálbmotdáiddárjoavkkuiguin máilmmis.

(viidáseappot čujuhuvvo stivrra bagadussii)

§ 4     LAHTTOVUOHTA
Sámi dáiddársearvvit mat organiserejit dáiddáriid, davviriikkalaččat ja riikkaidgaskasaččat, sáhttet ohcat lahttovuođa. Ohcamušaid gieđahallá ja mearrida jahkečoahkkin

§ 5     LAHTTOSERVVIID STÁHTUS
Lahttosearvvit oassálastet Sámi Dáiddárráđđái solidáralaš vuođu alde daid vuoigatvuođaiguin ja geatnegasvuođaiguin mat bohtet ovdan dáid njuolggadusain.
Lahttosearvvit leat iešmearrideaddjit sin ruđaideaset hálddaheamis ja sin dáiddafágalaš ja dáiddapolitihkalaš barggusteaset. Lahttosearvvit mákset lahttomávssu Sámi Dáiddárráđđái.

SDR:a jahkečoahkkin mearrida searvvi lahttomávssu.

§ 6     LIHCCUN
Stivralahtut guđet eai čuovo searvvi njuolggadusaid dahje eará láhkai vahágahttet searvvi siskkáldasat dahje olgguldasat, sáhttet lihccojuvvot. Mearrádus lihccoma hárrái dahká stivra 2/3 eanetloguin, muhto mearrádus sáhttá váidot jahkečoahkkimii.

§ 7     SDR:a ORGANISEREN
Stivrra bargu lea:

  • Hálddahit SDR:a ja dan mii guoská SDR:i ulbmilparagráfa ja mearriduvvon doaibmaplánaid mielde
  • Atnit bajit ovddasvástádusa SDR:a doaimmas
  • Mearridit SDR:a bušeahta
  • Bidjat virgái beaivválaš jođiheaddji
  • Mearridit SDR:a mannan jagi jahkerehketdoalu cuoŋománu loahpas
  • Muđui ráhkaduvvon stivrabagadusa mielde

Beaivválaš jođiheaddji (BJ):

BJ:s lea ovddasvástádus SDR:a beaivválaš jođiheamis. BJ lea eará virgehasaid lagamus bajibuš. BJ galgá bargat ulbmiliid mielde maid njuolggadusat ovdanbuktet, ja válddahusaid ja doaibmaplánaid mielde maid stivra čađat lea addán dahje ásahan.

BJ raportere stivrii ja ovddasvástida bohtosiin SDR:i stivrra bokte.

Stivra lea BJ:a bajimus mearrideaddji ja stivračoahkkimiid gaskkas lea stivrajođiheaddji geainna BJ šiehtada juos lea dárbu. BJ organisere čállingotti barggu ovttasráđiid stivrrain.

§ 8     REHKETDOALLU
Rehketdoalu galgá fievrridit autoriserejuvvon rehketdoalli dahje -firbmá, ja dárkkistit galgá autoriserejuvvon revisor dahje revisorfirbmá.

§ 9      DOAIBMA
Stivra galgá doallat uhcimustá 4 stivračoahkkima jahkái. Ekonomalaš oppalašgeahčastat gieđahallojuvvo stivračoahkkimis. Jahkegierdu oktan vejolaš lasáhusaiguin gieđahallojuvvo uhcimustá 2 gearddi jagis. Hálddahus addá raportta juohke jahkebealis.

Stivra ja BJ plánejit ja čađahit olgguldas šiehtadallamiid ja šiehtadusdahkamiid.

§ 10   JAHKEČOAHKKIN
Jahkečoahkkin dollojuvvo juohke jagi, miellasepmosit maŋŋil go lahttosearvvit leat doallan sin jahkečoahkkimiiddiset. Dalle go lea váttis deaivvadit fysalaččat sáhttá jahkečoahkkin lea digitálalaččat. Muhto maŋimustá geassemánu loahpas. Jahkečoahkkingohččun sáddejuvvo mánu ovdal go čoahkkin dollojuvvo.

Jahkečoahkkimis leat 2 ovddasteaddji iešguhtege lahttosearvvis, maid lahttosearvi ieš vállje. Ovddasteaddjit geat válljejuvvojit jahkečoahkkimii galget deavdit sámedikki jienastuslogu eavttuid.

Jahkečoahkkin gieđahallá dábálaš jahkečoahkkináššiid:

  1. Jahkedieđáhus
  2. Rehketdoallu oktan revisordieđáhusain
  3. Strategiija    ja   doaibmaplána
  4. Jahkebušeahtta
  5. Stivrahonorára
  6. Servviid lahttomáksu
  7. Njuolggadusat, dárkkisteapmi ja vejolaš rievdadeapmi
  8. Válggat
    a.       Stivra, 3 olbmo válgalávdegoddi evttoha stivrajođiheaddji, stivra- ja sadjásašlahtuid
    b.      Šiehtadallan- ja stipeanda- ja foandalávdegottit
    c.       Válgalávdegoddi
    Miellahttoservviid jahkečoahkkimat evttohit áirasiid SDR válgalávdegoddái
    d.      Dárkkisteaddji
    e.       Eará válljemat
  9. Jahkečoahkkincealkámušat

§ 11     EARENOAMÁŠ JAHKEČOAHKKIN
Earenoamáš jahkečoahkkin dollojuvvo juos 4:s lahttoservviin gáibidit dan. Earenoamáš jahkečoahkkimii gohččojuvvo mánu ovdal go čoahkkin dollojuvvo.

§ 12   LOAHPAHEAPMI
Sámi Dáiddárráđđi sáhttá dušše loahpahuvvot juos guovtti maŋŋálas jahkečoahkkimis, uhcimustá guovtti mánu gaskkain, mearriduvvo nu uhcimustá 2/3 eanetloguin. Vejolaš juolluduvvon ruđat fertejit máhcahuvvot juolludeaddji eiseváldái ovdal loahpaheami. Loahpaheami olis juogaduvvojit SDR:a ruđat ja geatnegasvuođat lahttoservviid gaskkas.

Mearriduvvon SDR:a earenoamáš jahkečoahkkimis 29.03.2017. Rievdaduvvon 20.06.19. Rievdaduvvon  16.06.2021