Ulbmil ja doaibma

Sámi Dáiddárráđđi (SDR) háliida ovddidit buori ja máŋggabealat sámi dáiddaeallima. Sámi Dáiddárráđi bargun lea doaibmat ráđđeorgánan 6 láhttosearvái ja ovddidit lahttoservviid ekonomalaš ja dáiddapolitihkalaš beroštumiid sihke ruhtadeaddjiide ja eará doaibmiide davviriikkalaččat. Dát guhtta sámi dáiddársearvvi ovddastit juoigiid, filbmabargiid, girječálliid, govvadáiddáriid, lávdedáiddáriid ja komponisttaid njealji riikkas.

Sámi Dáiddárráđđi ovddida ja doarju maiddái ruhtadoarjagiid bokte ovttaskas dáiddáriid ovdáneami fágalaččat. SDR hálddaša Sámi dáiddárstipeanddaid, Dáiddafoandda , jorgalandoarjagiid sámegiel girjjálašvuhtii ja Sámi Dáiddáriid ja Girječálliid Buhtadusfoandda (SDGB). Válljejuvvon ovddasteaddjit dáiddáriid gaskkas meannudit ruhtadoarjagiid fágalávdegottiid bokte. Ruđalaččat doarjjaortnegiid bokte juhkkojuvvojit sullii 5-6 miljon Norgga ruvnnu ovddas doarjagat jahkásaččat Sámi dáiddáriidda ja lágádusaide.

SDR:a doaimma jođiha stivra, mas leat guhtta lahtu dáiddárservviin. SDR doaimma ruhtadit Sámedikkit Norggas, Suomas ja Ruoŧas ja Davviriikkaid Ministtarráđđi ja SDR bargáge dáiddapolitihkalaččat buot Sámedikkiid, Davviriikkaid Ministtarráđi ja eará ásahusaid ektui, maiddái riikkaidgaskasaččat.