Giitosátni – Simona Máhttii

Máhtte, muhtun olbmo muitui eai baljo gávdno sánit mat gokčet eallima mávssolaš vuođa, muhto dan mii eat vikka ge dahkat.
Mii áigut baicca giitit du, Máhtte. Simona Máhtte. Don iđistit lávdái, máilmmi lávdái, midjiide sápmelaččaide hui dorvvusin, sidjiide olggobealde olbmuide fuomášupmin sápmelaččaid birra.

Mii áigut giitit du, Máhtte. Simona Máhtte. Don čalmmustahttet luođi ja sápmelačča ja Máze dili dulvadeami áiggis.

Mii áigut giitit du, Máhtte. Simona Máhtte. Don vuollegašvuođain reŋgojit sámi kultuvrra ja barget viššalit maiddái Sámi Dáiddáriid ovddas. Don barget Juoigiid Searvvi ovddas ja beroštit álo jearrat mii dál dáhpáhuvvá Juoigiid Servviin. Don ledjet maid ovtta gaska Juoigiid Searvvi jođiheaddji.

Mii áigut giitit du, Máhtte. Simona Máhtte. Don nu duostilit ledjet Máze beali ja dajahallet ahte Čáppa Golle Máze it goassege guođe. Dál go leat fas iežat čáppa golle Mázii boahtán vuoiŋŋastit, de báhcá du muitu midjiide dego dajahussan. Dajahus lea midjiide sámiide buot divraseamos poesiija, ja ellos du muitu dego dajahus biekkas go Máze lottážat vizardit giđđat, ja nie buktet ođđa dajahusat sámi eadnamii. Dat gii sámi unna gilážiid ráhkista lea dego diet unna lottaš gii ain dahká beasi ja ii goassege atte vuollái iežas ruovttu.

Diekkár ledjet don midjiide, ráhkis Simona Máhtte.

Don bázat midjiide dajahussan.

Vuoiŋŋat dál ráfis. Mii gudnejahttit du nama.

Maŋemuš dearvvuođat Juoigiid Searvvis