Vástádus eana –the answer is land

Dál lean vásihan juoidá maid in lean dieđusge vuordán ge. Lean finadan luođi vuoiŋŋahagas ja dovdduin. Buorre, somá, bravo leat sánit mat šaddet áibbas joavdelas adjektiivan go galggan dán čájálmasa govvidit mii 29.01.22 čájehuvvui Tromssas, Hålogaland teáhteris.
Čájálmas álggii olggobealde teáhtervisti. 7 nissonolbmo čáhppes biktasiiguin ja gahpirat oaivvis dego rukses čuorvvasmearkat čáhppada vuostá. Giitos ja sivdnádus luđiin báikái rokkastedje gehččiid dovdduid. Dat ii leat daddjon mihkkege, muhto mun oaivvildan ahte lohku 7 lea dat sámi bassi lohku eanas oasis mytologiijas, nu ahte dieinna lágiin lei maid hui olu magiija.

Bajasšadden juoiganárbeviruin mii dávistii eallima. Dalle lei luođi gulahallan ealas. Luođi dajahusat muitaledje čiekŋalit juoidá maid nubbi beasai smiehtadit. Olbmot dulkojedje guđet guimmiideaset luđiid ja smiehtadedje maid dál diet juoigi rievttimielde oaivvildii. Dál ii leat šat nie. Diet oassi lea jávkame.

Čájálmas nagodii mu mielas dien fas boktit. Olmmoš beasai ieš smiehttat ja váldit vuostá dan maid luohti attii. Čájálmas divttii enn váldokaraktera rahčat oaivila oidnosii, ja dat earát de bealuštedje dege vuosttildedje. Scenas scenii. Ja mun čuvvon scenas scenii.
Čájálmas álggii fas siste dego dološ govain, eai lean ivnnit ja mun váillahin ivnniid ja fuomášin man dehálaš ivdni lea munnje go galggan geahččat mailmmi. Go de rahpasii fas muitalus ivdnin de lei duođai ge lihkko dovdu.

Dánsarat gal maid himsaledje albmage ládje ja áiggun namuhit earenoamážit Emilie Marie Karlsena. Son gal loktii bihttá dárbbu ja dovdduid bures, dakko gokko luohti cohkkogođii de bođii dánsa ja veahkehii. Vel dánsun oassi nai lei roahkka birget sierra muitalussan.
Hans Baltto Franke Kajsa ja Iŋgor Ánte Ánte-Mihkkala Sara Marielle Gaup leaba juoigit! Soai hálddašeaba dien eami máhtu bures. Jietnabáttit bukte duođai čiekŋalis dáidaga dán bihttái.

Go in leat musihkkár de in dieđe nu ollu, muhto gal Frode Fjellheim lea bures heivehan vel dán háve ge luođi otná lávdái nu vuohkkasit ahte olmmoš ii obage mearkkaš dat lea čájálmas. Dá lea dakkár bihttá maid mun jurddašan sáhtálii báddet vaikko skearrun go das ledje nu olu ivdnás jietna bálgát.
Ganjaldin dán bihttás máŋgii go dat čuzii. Elle Sofe Sara lea nagodan olihit gehččiid dovdduide. Giitu.

Čálii Bede Bireha Gáren Ánná