Bures boahtin John Savio bálkkašumi geigendilálašvuhtii 18.09.21

John Savio bálkkášupmi geigejuvvo Hans Ragnar Mathisenii / Keviselie / Elle-Hánsa
Bálkkašumi geigendilálašvuohta lágiduvvo: Romssa Dáiddasiida/Tromsø kunstforening (RDS/TKF)

Lávvardaga čákčamánu 18. b. dii. 13.00

Doaluid oktavuođas rahppojuvvo maiddái bálkkašumi vuoiti sierračájáhus “ČSV terra cognita”. Čájáhus lea ovttasbargu gaskal Árran Julevsáme guovdásj ja TKF/RDF, ja sisdoallá badjel 10 000 dáidaga maid dáiddár lea skeŋken Árranii. “ČSV terra cognita” čájeha vuosttaš geardde dáiddára buvttadeamiid álgobargguid rájes 1966:s gitta otnábeaivvi rádjai.

Maŋŋil bálkkašumi juohkima ja čájáhusrahpama leat buohkat bures boahtin ávvudit bálkkašumi vuoiti Storgata campingas. Campingas leat sáhkavuorut, dáiddalaš ovdanbuktojumit ja guossoheapmi.

PROGRÁMMA

13:00 Bálkkašumi geigen
14:00 Čájáhusrahpan
Sámedikki presideanta Aili Keskitalo rahpá čájáhusa.
Čájáhus lea rabas gussiide dii. 17:00 rádjai.
16:00 – 18:00 Rabas doalut
Storgata Campingas (Storgata 5, nuppebealde TKF/RDS).

Keviselie / Hans Ragnar Mathisen
Foto: Tanya Busse / Tromsø Kunstforening, 2021

John Savio-bálkkášupmi

John Savio-bálkkašupmi lea 150 000 ruvnnu, ja ulbmil dainna lea čalmmustahtit sámi dáidaga, bálkášuvvon dáiddára ja su dáiddabargguid. Bálkkašupmi juhkojuvvo juohke nuppi jagi, ja lea ásahuvvon ovttasbarggu bokte gaskal Bildende Kunstneres Hjelpefond, Sámi Dáiddačehpiidsearvi ja Nordnorsk kunstmuseum.

Hans Ragnar Mathisen

Dáiddár Hans Ragnar Mathisen, dahje Elle-Hánsa/Keviselie (r. 1945 Áhkánjárggas) lea erenoamážit dovddus giehtasárgojuvvon gárttáidisguin sámi báikkiin oktan sámi báikenamaiguin, ja dáidagiides dihte mat čájehit stuorra áŋgiruššama Sámi kultuvrii ja eamitálbmogiid vuoigatvuođaide. Oassi su grafálaš váldobárgguin leat “Meavrresgárre ráidu” Fra en sfære til den neste, Trommens tid, Strid og Formalisering (1994–1995). Mathisen lea maiddái bargan bácciin, installašuvnnain, akvareallain, njuohtamiin, govvidemiin, sisttiin ja girječatnamiin. 2017:s oassálasttii son Documenta 14:is Athenas ja Kasselis guvttiin gráfihkain ja guđain giehtasárgojuvvon Sápmi kárttáin.

Loga eanet dieđuid ja jury cealkámuša: kunstfond.no