Dáiddafoandda logogilvvu vuoiti – Josef Halse

Dáiddafoanda lea foanda maid Sámi Dáiddárráđđi hálddaša.  Vuosttas juolludeamit min dáiddáriidda ledje 2007:s. Áigodagas 2007-2021 leat 76 oktasaš prošeavttaide juolluduvvon ruđat, mas leamaš ovttasbargu gaskal iešguđetge dáiddársurggiid. Dasa lassin leat áigodagas 2011-2021, 159 eaŋkil dáiddáriidda juolluduvvon doarjagat, ja 20 olbmo leat ožžon coronaruđaid.

Dáiddafoanddas ii leamaš goassige albma logo, dušše teaksta vissis fonttaiguin. Lei dárbu oažžut  logo go dáiddárat geat ožžot doarjagiid Dáiddafoanddas geavahit logo plakáhtaide, gihppagiidda, ja eará dáiddaguoskevaš áššiide nugo filmmain, čájehan dihtii gii lea ruhtadan sin.

Logogilvui bohte 12 iešguhtetlágan evttohusa. Jurys ledje 2 dáiddára; Ulrika Tapio Blind ja Andreas Holtung, ja okta olmmoš hálddáhusas; Mona Kemi ledje buohkat ovttaoaivilis ahte Josef Halse nubbi evttohus lei vuoitologo.

Logo birra dadjá jury:
Logo hápmi lea čorgat ja eaŋkal. Teaksta ja govva lea čielggas, das lea buhtes stiila ja lea elegánta hápmi. Logo heive buot lágan dáiddársurggiide mainna Dáiddafoanda bargá.

Sámi Dáiddárráđđi guhte hálddaša Dáiddafoanda lea logo oamasteaddji.
Josef Halse vuittii 25 000 NOK.