Sámi Dáiddárráđđi (SDR) lea organisašuvdna man Sámi dáiddársearvvit ásahedje 1987:s. Ulbmilin lea ovddidit buori ja máŋggabealat sámi dáiddaeallima. SDR doaibmá oktasaš čállingoddin guđa sámi dáiddársearvái, mas leat juoigit, filbmabargit, girječállit, govvadáiddárat, lávdedáiddárat ja komponisttat mielde njealji riikkas. SDR bargu lea ovddidit ráđi ja lahttoservviid ekonomalaš ja dáiddapolitihkalaš beroštumiid ja hálddašit dáiddáriidda ja ásahusaide oaivvilduvvon doarjjaortnegiid. Sámi Dáiddárráđi doaimma ruhtadit Sámedikkit Norggas, Suomas ja Ruoŧas ja Davviriikkaid ministtarráđđi.