Jahkečoahkkincealkámuš Sámi Dáiddamusea birra / Samisk kunstmuseum

Jahkečoahkkincealkámuš Sámi Dáiddamusea birra / Samisk kunstmuseum

Kulturdepartemeantta evttohus Museadieđáhusas, ja dieđáhusa kapihttala Dáidda davvin, boahtá ovdan ahte departemeanta háliida veahkehit stuoridit areálaid Sámiid Vuorká-Dávviris /De Samiske Samlinger (SVD) Kárášjogas, vai šaddá buoret sadji sámiid dáidagiide ja vejolašvuohta dáiddačoakkáldaga čájehit. Mii ohcalit ahte doahpa Sámi Dáiddamusea/Samisk Kunstmuseum  geavahuvvo teavsttas Museadieđáhusas, ja ávžžuhit garrasit ahte Stuorradikki Bearaš- ja kulturlávdegoddi oččodit dan čielgasit ahte lea Sámi Dáiddamusea / Samisk kunstmuseum maid háliidat realiserejuvvot.

Sámi Dáiddačehpiid Searvi / Samisk Kunstnerforbund doarju barggu ásahit ja hukset sierra Sámi Dáiddamusea / Samisk Kunstmuseum, koordinerejuvvon SVD:an, ja mas lea doarvái areálat, mas lea sierra autonoma stivra mas leat dáiddafágalaš ovddasteaddjit ja mas leat iežaset dáiddafágalaš bargit mat galget gaskkustit ja hálddašit dáidagiid boahttevaš Sámi Dáiddamuseas / Samisk Kunstmuseum.

Sámi Dáiddačehpiid Searvi / Samisk Kunstnerforbund illuda veahkehit konstruktiivvalaččat gelbbolašvuođain ja fierpmádagain viidásat proseassas.

SÁMI DÁIDDAČEHPIID SEARVVI JAHKEČOAHKKIMIS CUOŊOMÁNU 24.B. 2021