Davvisámegiella 
English 
Norsk 
Suomi 
Pусский 
Åarjelsaemiengïelese 
Lihkkosávaldagat Niviaq Korneliussenii ja Kalaallit Nunaat:a (Ruonáeatnama) Girječálliid Searvái
SGS 23.04.2022 jahkečoahkkin Kárášjogas sávvá lihku Davviriikkaid Ráđi girjjálašvuođa bálkkašumiin 2021 maid Niviaq Korneliussen oaččui románain Naasuliardarpi. Dan Niviaq ieš lea jorgalan dánskagillii: Blomsterdalen (sámegillii: Lieđđeleahki). Niviaqa vuosttaš romána Homo Sapienne lei evttohuvvon oažžut Davviriikkaid Ráđi bálkkašumi 2014.
Kalaallit Nunaat (Ruonáeatnan) vuoitá vuosttaš geardde dán bálkkašumi, ja dát lea Kalaallit Nunaat:a Girječálliid Searvái, Kalaallit Atuakkiortut, stuorra gudnin, ja maiddái Kalaallit Nunaat:a (Ruonáeatnama) álbmoga ja máilmmi álgoálbmogiiid girjjálašvuhtii.
Girji čájeha ahte Kalaallit Nunaat:a girječálliin – nu go earáge álgoálbmotgirječálliin – lea alla dási girječállindáidu. 32-jahkásaš girječálli Niviaq Korneliussen lea čállán dehálaš girjji álgoálbmotnuoraid identitehtaozus.
Girji muitala áššiin mat leat raššivuođa buktán sin servodahkii – ja olu eará álgoálbmotservodagaidege nu go jugešvuohta ja iešsorbmen. Seammás girji govve ráhkisvuođa ja ustitvuođa. SGS lea ilus go sámi lágádus Davvi Girji áigu jorgalahttit girjji sámegillii ja almmuhit dan.
SGS fuomášuhtta ahte 2021:s lei 30 jagi dássái go Davviriikkaid Ráđi girjjálašvuođa bálkkašumpi geigejuvvuo sámegiel girječállái, Áillohažžii, Nils Aslak Valkeapää, Beaivi, Áhčážan (Solen, min far), girjjiin DAT lágádus, 1988.
SGS illuda sámeálbmoga bealis Kalaallit Nunaat:a girječálliiguin ja leat hirbmat rámis Niviaq Korneliussena vuittuin, cealká SGS jahkečoahkkin 2022. SGS jahkečoahkkin lea maid ilus go Davvi Girji áigu jorgalahttit girjji sámegillii ja almmuhit dan.