Preassadieđáhus 20.12.2021 Lihkkosávaldagat Niviaq Korneliussenii ja Kalaallit Nunaat:a (Ruonáeatnama) Girječálliid Searvái: SGS ávvuda ovttas Ruonáeatnama Girječálliid Servviin

Lihkku lehkos 31-jahkásaš Niviaqii ja Kalaallit Atuakkiortut:ii girjjálašvuođabálkka- šumiin! sávvá SGS-Sámi Girječálliid Searvi, ja oaivvilda ahte vuoitogirji Naasuliardarpi (sámegillii: Lieđđeleahki), berre jorgaluvvot sámegielaide.

Sámi Girječálliid Searvi (SGS) sávvá lihku Davviriikkaid Ráđi girjjálašvuođa bálkkašumiin maid Niviaq Korneliussen oaččui románain Naasuliardarpi, maid Niviaq ieš lea jorgalan dánskagillii: Blomsterdalen (sámegillii: Lieđđeleahki).
Girji lea maiddái jorgaluvvon dárogillii. Niviaqa vuosttaš romána Homo Sapienne lei evttohuvvon oažžut Davviriikkaid Ráđi bálkkašumi 2014.

Niviaq Korneliussen, vuosttaš girječálli Kalaallit N naat:as (Ruonáeatnamis) vuoitit Davvirikkaid Ráđi girjjálašvuođa bálkkašumi. Girji lea Naasuliardarpi, maid Niviaq ieš jorgalii dánskagillii. Govvidan: Angu Motzfeldt

Kalaallit Nunaat (Ruonáeatnan) vuoitá vuosttaš geardde dán bálkkašumi, ja dát lea Kalaallit Nunaat:a Girječálliid Searvái, Kalaallit Atuakkiortut, stuorra gudnin, ja maiddái Kalaallit Nunaat:a (Ruonáeatnama) álbmoga ja máilmmi álgoálbmogiiid girjjálašvuhtii.

Girji čájeha ahte Kalaallit Nunaat:a girječálliin – nu go earáge álgoálbmotgirječálliin – lea alla dási girječállindáidu. 31-jahkásaš girječálli Niviaq Korneliussen lea čállán dehálaš girjji álgoálbmotnuoraid identitehtaozus. Girji muitala áššiin mat leat raššivuođa buktán sin servodahkii – ja olu eará álgoálbmotservodagaidege nu go jugešvuohta ja iešsorbmen. Seammás girji govve ráhkisvuođa ja ustitvuođa. SGS oaivvilda ahte girji berre jorgaluvvot sámegielaide, vai min gillii almmuhuvvo dákkár erenoamáš árvosaš girjjálašvuohta.

Sámi Girječállid searvvi mielas girji Naasuliardarpi (Lieđđeleahki), mii dárogillii lea jorgaluvvon “Blomsterdalen”, berre sámegielaidege jorgaluvvot. Girji lea nuoraid ráhkis- ja ustitvuođa, identitehta ozu ja iešsorbmenkultuvrra birra Kalaallit Nunaat:as (Ruonáeatnamis).

Niviaq Korneliussen searvvai 2021 giđa neahta bokte Lillehammer girjjálašvuođafestiválii.

Screenshot NRK-sáddagis: https://tv.nrk.no/serie/festivalsommer/2021/MKMU81000221

SGS fuomášuhtta ahte dán jagi lea justa 30 jagi dássái go Davviriikkaid Ráđi girjjálašvuođa bálkkašumi geigejuvvuo sámegiel girječállái, Áillohažžii, Nils Aslak Valkeapää, Beaivi, Áhčážan (Solen, min far), DAT lágádus, 1988. -SGS illuda sámeálbmoga bealis Kalaallit Nunaat:a girječálliiguin ja leat hirbmat rápmásat Niviaq Korneliusseniin vuittuin, cealká Inga Ravna Eira, SGS stivrra jođiheaddji.