Sámediggi dáiddárstipeandda juolledeamit 2021

Seniorstipeanda (bargostipeanda) lea juolluduvvon glássadáidárii Monica L. Edmondsonii 7 jahkái ja 5 mánnui.

Monica L. Edmondson lea julevsápmelaš ja ássá Deartnás. Son lea ollesáigge dáiddár ja lea iežas barggus dáiddáriin, mas geahčastat lea glássa, sierra  persovnnalaš dáiddagiella mas sámevuohta deaivida riikkaidgaskasaš beali sihke teknihkalaččat ja konseptualalaččat. Su fágagelbbolašvuođain, ja su glássabájis ja atelieras, rahkada son sihke smávit ja stuorát installašuvnnaid ja doaimmaha čiŋahanbargguid.

Iežas boahttevaš barggus háliida son earret eará fáhtet ja hábmet jurdagiid ja historjjáid otnáš rájes ja gođđit daid oktii ovddeš buolvvaid muitalusaiguin, ja dasa lassin čiekŋudit iežas hábme, ivdne- ja minsttarárbevearuide iešguđetge ávdnasiid bokte.

Edmondson lea ožžon Rubus Arcticus Kulturbálkkašumi 2005 jagis ja Kungliga Skytteanska Samfundets Stora Pris – bálkkašumi 2014 jagis.

 

Bargostipeanda lea juolluduvvon juoigái Marja Mortensson 3 jahkái

Marja Mortensson lea máttasápmelaš guhte ássá Jonsvatnes. Mortensson lea vuoitán máŋga bálkkašumi omd Spellemannsprisen 2018is skearruin “Mojhtestasse – Cultural Heirlooms” ja Sami Music Awards i 2015is. Sus leamaš konsearttat, lea oasálastán festiválain sihke nationálalaš ja riikkaidgaskasaš dásis.

Marja Mortensson háliida stipeanddain bargat earret eará mátta- ja ubmisámi luđiiguin, muitalanárbevearuin ja dokumenteret mátta- ja ubmisámi juoiganárbevearu. Mátta- ja ubmisáme luođit eai leat gullon áktánasat sámis, ja dan lea dehálaš doalahit ja ovddidit boahtte áigái.

 

Bargostipeanda nuorat easkaálgi dáiddariidde lea juolluduvvon girječállái Inga Elin Marakatt ja musihkkarii/artistii Peder Niilas Tårnesvik

 

Inga Elin Marakatt lea Ađevuomis eret. Marakatt lea girječálli ja lea álmmuhan máŋga girjji earret eará    “Sáve Sápmi” mii lea su vuosttas nuoraidromána, son lea maid čállán oanehisfilbma giehtačállosa. Marakatt háliida stipeanddain čállit triologiija, mii lea joatkka Sáve Sápmái. Son geavaha somás málle muitalit váttis tabu:a áššiid birra sámi servodagas dego baluid birra psyhkalaš dearvvasvuođas, boazodoalu ođđaáigásaš hástalusaid birra ja geafivuođa.

 

 

 

Peder Niilas Tårnesvik guhte ássá Bergenis lea nuorra miellagiddevaš artista ja son bargá elektrovnnalaš musihkain. Tårnesvik lea almmuhan máŋga skearru, dahkan dáiddalaš diŋgonbargguid ja oasálastán máŋgga festiválas. Juoidá mii čuovvu su produkšuvnnaid lea detáljat ja melonkoalalaš vuođđodovdu kombinerejuvvon máŋggadáfot rytmmain. Tårnesvik geahččala bargat šáŋŋerkeahttá nu ahte musihkka ráhkaduvvo iežas premissain.

 

 

Oanehisáiggestipeanda (bargostipeanda) lea juolluduvvon filbmadahkkái Per Ivar Jensenii 6. mánnui.

Per Ivar Jensen ássá Oslos ja son lea máŋggabealat dáiddár guhte bargá máŋga dáiddársurggiin. Sus lea sihke filbmaoahppu ja TV-buvttadeami oahppu. Son lea buvttadan máŋga oanehisfilmma earret eará «Taxi fra Båtsfjord»  ja «Ho mamma er dau for helvete», son lea maid álmmuhan máŋgga skearru,  komponeren musihka ja leamašan mielde teáhterbuvttademiin. Jensen lea vuoitán máŋga bálkkašumi ovdamearkka dihtii Gullpalmen buoremus filbma MITILas Sveitsas.

 

Iešguđetlágan smávit stipeanddat leat juolluduvvon:

Elin Kåven                     čiekŋudit vokálateknihkkii        75 000 ru.

Georg Buljo                  rahkadit rumbogitára               45 000 ru.

John Kåre Hansen        ávnnasstipeanda                       30 000 ru.

Silja Somby                  ávnnasstipeanda                       50 000 ru.

Rawdna Carita Eira      mátke- ja prošeaktastipeanda   30 000 ru.

Margrethe Iren Pettersen, prošeaktastipeanda             35 000 ru.

Gjert Rognli                 mátke- ja oahppostipeanda       49 500 ru.

Inga Marja Sarre         čiekŋudit vokálateknihkas          84 500 ru.

Kristin Tårnesvik          ávnnas- ja buvttadeapmái         50 000 ru.

Johan Sara jr               ávnnasstipeanda                        21 000 ru.

Marja Bål Nango,        photoshop/design                    30 000 ru.

Beate Heide                mátke- ja oahppostipeanda       50 000 ru.